Потрошувачката кошница во август 11.891 денари

 

Вредноста на потрошувачката кошница за исхрана и пијалаци за едно четиричлено домаќинство, пресметана врз основа на цените на мало, во август годинава изнесува 11.891 денари и во однос на претходниот месец е на истото ниво.

Цените на мало во август 2010, во споредба со јули 2010, е повисок за 0,2 отсто, а индексот на трошоците на животот е повисок за 0,1 отсто.

Порастот на трошоците на животот од 0,1 отсто е резултат на повисоките индекси на мастите за 10,8 отсто, јајцата за 1,9 отсто, преработениот и конзервираниот зеленчук за 0,5 отсто и на месото за 0,2 отсто.

Во август, пораст на индексите на трошоците на животот е забележан и кај централното греење за 10,9 отсто, средствата за образование за 1,1 отсто и административните услуги за 0,3 отсто.

Намалување на индексот на трошоците на животот во август 2010 година, во споредба со претходниот месец, е забележан кај овошјето за 2,6 отсто, зеленчукот за 1,9 отсто, свежото млеко и другите прехранбени производи за 0,5 отсто, млечните производи за 0,4 отсто, безалкохолните пијалаци за 0,3 отсто, производите од жито и преработките од месо за 0,2 отсто.

Намалување на индексот на трошоците на животот е забележано кај нафтените деривати за 1,4 отсто, средствата за хигиена за 0,7 отсто, апаратите за домаќинството за 0,4 отсто и мебелот за 0,2 отсто.

На ниво од претходниот месец останаа индексите на групите: Облека и обувки и Ресторани и хотели.

Индексот на цените на мало во август 2010 година, во споредба со август 2009 година, бележи пораст од 2,5 отсто, а трошоците на животот бележат пораст од 1,9 отсто.